मुंबई : खानदेशातील भाजपाचा बडा नेता राष्ट्रवादीच्या वाटेवर असल्याची धक्कादायक माहिती पुढे येत आहे. यामध्ये विशेषतः भाजपाच्या नेतृत्वावर टीका करणारे ज्येष्ठ नेते एकनाथ खडसे यांचे नाव पुढे येण्याची शक्यता असल्याचे बोलले जात आहे. दरम्यान राष्ट्रवादी कॉंग्रेसच्या कार्यालयात बैठक सुरू असून स्थानिक पातळीवरील नेत्यांशी चर्चा करून पुढील दिशा ठरविणार असल्याचे बोलले जात आहे.
भाजपमध्ये गेल्या बऱ्याच काळापासून नाराज असणारे खडसे आता राष्ट्रवादीच्या वाटेवर असल्याच्या चर्चा सुरु झाल्या आहेत. राष्ट्रवादीचे सर्वेसर्वा शरद पवार यांच्या अध्यक्षतेखाली सुरु असणाऱ्या बैठकीमध्ये या मुद्द्यावर चर्चा होणार असून, त्याबाबतचा निर्णयही होणार असल्याचं म्हटलं जात आहे. जळगावमध्ये राष्ट्रवादीची कमी होणारी ताकद वाढवण्यासाठी खडसेंपुढे प्रस्ताव मांडणं हे राष्ट्रवादीच्या दृष्टीनं फायद्याचं ठरु शकतं ही बाबही तितकीच महत्त्वाची आहे.
सध्याच्या घडीला जळगावमधील राष्ट्रवादीच्या नेत्यांसमवेत खुद्द शरद पवार आणि अजित पवार बैठक घेत आहेत. या बैठकीला जळगावमधील माजी आमदार गुलाबराव देवकर, सतीश पाटील, आमदार अनिल भाईदास पाटील यांची उपस्थिती असल्याचं कळत आहे.
जवळपास ४५ वर्षांहून अधिक काळ भाजपमध्ये सक्रीय असलेले एकनाथ खडसे गेल्या काही काळापासून पक्षावर नाराज आहेत. पक्ष नेतृत्वाकडून आपल्याला डावललं जात असल्याची खंत त्यांनी अनेकदा बोलून दाखवली होती. त्यामुळं नाराज एकनाथ खडसे राष्ट्रवादीत जाणार का? अशा चर्चेनं जोर धरला आहे.